الزين ما يكمل =(

سلام صبايا...
شو الأخبار...

معاكم مراسلتكم د.حنو قاعدة أكتب من غرفة وافي بالمدينة =)

المهم أمس بالنسبة لي كان يوم حافل جدا .. وهذي بعض الأحداث اللي صارت

الساعة 7:00 صباحا رحت للجامعة عشان الدوام الصيفي {الناس تسافر وحنا ندرس}

الساعة 10:00 صباحا رجعت البيت وبديت أجهز شنطتي عشان رحلة المدينة و كل ما حطيت قطعة ملابس بالشنطة التفت على محمد أخوي عشان أقومه {لأنه هو المرافق حقي} والحمد لله بعد نص ساعة تضمنت فك و صك الشنطة عدة مرات و أيقاظ حمودي عدة مرات أيضا ركبنا السيارة و توجهنا لمطار الملك عبدالعزيز

الساعة 12:50 ظهرا أنا و حمودي قاعدين بالطيارة درجة أولى نتقهوة و نآكل تمر و نسولف
طيب مااااااااشي الين هنا و اليوم جميل جدا

الساعة 2:00 المفروض تهبط الطيارة لكن بسبب بعض العواصف الرملية ما قدرنا ننزل و قعدنا ربع ساعة و حنا ندور حول نفس الجبل الين ما راسي دااااااااخ و شوي و بأقوم و اتهاوش مع الكبتن

الساعة 3:00 رجعنا البيت و اتغديت غدا مرررررة لذيذ سوته وافي {احم احم والله وكبرنا و صرنا نطبخ }

الساعة 4:00 أنا ووافي قاعدين على سريرها نتفرج فيلم 17 again حق zac effron وخاقيييين عليه =)

الساعة 6:00 ماما أخذتنا لمجمع النور {مول بالمدينة مرا كبير و الأسواق اللي فيه مرا خطيرة}

الساعة 7:00 قاعدين نآكل آيس كريم عشان أذن للصلاة و قفلت المحلات و في هذه الأثناء أرسلت لغرغر رسالة أقهرها عشان هي كانت عند ناس غثيثين و أنا مستانسة

الساعة 9:00 أنا و وافي قاعدين نتسوق ب new look وماما وأخواتي الصغار في محل ثاني.. وبينما أنا قاعدة أقنع وافي تشتري بلوزة حمرا {هي مرا تكره ذا اللون} إلا ماما جاية عندنا و مرا معصبة تقول شنطتي انسرقت و فيها جوالي و بطاقاتي {الله لا يبارك بعمره اللي سرقها و إن شاء الله تنشل يده}... عاد أنا راح بالي لسببين لهذه الحادثة المؤسفة ألا وهي:
1- لمن أرسلت لغرغر رسالة الجوال صكتني بعين محترمة وحسدتني على وناستي {افا يا غرغر هذي أخرتها- خخخخ}
2- أنا كانت نيتي شينة يوم أرسلت الرسالة فربي عاقبني وخلى الليلة تنقلب من وناسة لتعاسة {أشك في هذا السبب- خخخخ}

عاد الله أعلم أي سبب هو الصح {مع إني أرجح الأول-- بتتصفق}

وبس رجعنا البيت و الكل صار معصب لأسباب مختلفة...
اللي يقول أنتو أصلا وش اللي وداكم اسوق
واللي يقول أنا قلت لكم روحوا مجمع الراشد لو سمعتوا كلامي كان ما صار هذا كله
واللي يقول ليه ما جبتوا لي آيس كريم معاكم {هذا وين و حنا وين}
والبنات الصغار يصيحون وحدة خايفة أنها تنسرق زي ما الشنطة انسرقت و الثانية منكدة عشان قومناها من النوم و وافي قاعدة تسكت فيهم

أما أنا فقاعدة أضحك و أقول بنفسي لله يوم واحد يتم بدون نكد... بس أبي يوم واحد يكون خالي من المنغصات... لكن على رأي المثل: "الزين ما يكمل"